(Aruba) Vuelo di Avianca pa Aruba a desvia asina hopi djis pa no drenta espacio aereo Venezolano

Na prome instante Avianca a anuncia cu nan lo stop di bula pa Venezuela entrante 16 di Augustus venidero. Pero algo a pasa, y Diahuebs mainta mes, 27 di Juli, gerencia di e aerolinea Colombiano a laga sa cu nan lo no bula mas pa Venezuela. Avianca tabatin conexion directo cu Caracas for di tanto Bogota, como tambe di Lima (Peru).

Avianca no kier bisa directamente kico a socede. Pero por a nota cu awor e avionnan di Avianca ta hasta trata di evita di pasa y cruza espacio aereo Venezolano.

E conflicto cu Venezuela, a pone cu Diahuebs caba Avianca a stop tur vuelo pa y for di Venezuela.

 

Y esey no ta tur! Hasta aworaki Avianca ta simplemente trata na evita cu nan avionnan ta drenta espacio aereo Venezolano.

Diahuebs atardi mes, e avion Airbus A320-200 di Avianca pa e vuelo 8384 di Bogota pa Aruba, a dura como 2 ora.

Normal e vuelo aki ta dura 1 ora y 25 minuut.

Sinembargo manera por mira riba e mapa aki, e Flightplan a pone cu e avion no a tuma e ruta di Bogota pa Maracaibo y despues yega Aruba.

Na altura di Cucuta e avion a bira direccion Noord-Noordwest pa asina subi lama Caribe via di Santa Marta.

Aki el a sigui bula te Noordwest di Aruba, y bira pa un linea straight pa Aeropuerto di Aruba.

Pa e motibo di e retrazo aki, e vuelo cu a sali pa Bogota despues a lanta te banda di 7:14 pm. Atrobe e avion a tuma casi mesun ruta, bayendo full pabao riba lama Caribe, y drenta bek via di Santa Marta.

Tog e vuelo di ayeranochi a pasa brevemente riba teritorio Venezolano, pasobra despues di Valledupar e avion a tuma rumbo di man robez, y a bula pa como 15 pa 20 minuut riba teritorio Venezolano, e.o. Parque Nacional Cienagas de Juan Manuel, y drenta bek Colombia na altura di Campo Dos (panort di Cucuta).

No ta Avianca so ta evitando di pasa riba teritorio Venezolano desde ayera. Varios aeolinea incluyendo Delta ta buscando ruta alternativo pa evita di pasa riba Venezuela.

Diahuebs anochi DIARIO a nota cu otro aerolinenan si ta sigui sobrebula Venezuela normal, e.o. American Airlines, Air France, KLM, Aerolineas Argentinas.

Riba e grafico por mira con e avion di Avianca for di Bogota, a desvia asina hopi pa por a yega Aruba. Esey a dura como 30 minuut extra.

Fuente: https://www.diario.aw