(Aruba) Segun Parlamentario di AVP, Chris Dammers: Benta di Valero na CITGO ainda lo mester trece den caha di Gobierno e suma 67 miyon

Recientemente Banco Central di Aruba p’e “Economic Outlock 2017” publica 13 mei 2017, a pronostica un crecemento economico pa aňa 2017 di 3.4% di nos GDP te na 4.819 miyon. Esaki ta principalmente basa riba un crecemento anticipa den e desaroyo den CITGO y un crecemento di 1.3% den e entradanan di turismo, segun Parlamentario di AVP, Chris Dammers.

Tambe e aña aki nos a habri aňa caminda IMF y Fitch a haci un auditorio cada un apart riba nan rekisitonan riba e situacion financiero di pais Aruba.

Pa locual tabata IMF nan a keda satisfecho cu adelantonan cu nan a mira y muy primordialmente e varios cumplimento ya menciona den e relato di Banco Central menciona.

Pa locual ta Fitch nan a reconfirma nos categoria bou di BBB- y di ta den un economia cu un ‘outlook stable.’

Pa locual t’e di 7 reportahe kwartaal cu Departamento di Finansa di Gobierno a presenta nos por bisa cu den tur 7 kwartaal cu oposicion a grita cu fin di aňa nos lo no haal e normanan stipula den e ley di CAFT.

Na aña 2015 nos mester a cumpli cu un deficit di 3.4% y nos a logra uno di 2%. Na aña 2016 esaki mester tabata 2% y nos a haal e 2%.

Pa 2017 segun presupuesto di Aruba, aproba mester ta na 0.5%, cual cifra nos lo alcansa atrobe sigur segun e expertonan di Directie Financien. No tin ningun duda cu esaki lo wordo alcansa.

E sumanan di VAS (voldoening op aangifte systematiek) cu su introduccion na comienso di aňa 2016 a wordo cobra den e prome kwartaal, awor na 2017 ta wordo cobra den e di 2 y 3 kwartaal cu nos mester haya ainda;

Un parti di e ‘settlement agreement’ di Valero, cual t’e mitar di e suma total, mester wordo transferi ainda di Refineria di Aruba N.V. pa Gobierno. Tambe e benta di e Valero Marketing & Supply Aruba, incluyendo e pompnan di gasolin cu den e traspaso di Valero a keda pa pais Aruba, mester wordo bendi ainda e aňa aki, segun Chris Dammers di AVP.

E 2 ultimo entradanan aki relaciona cu e bendemento di Valero na CITGO lo mester trece den caha di Gobierno un suma 67 miyon ainda prome cu fin di aňa 2017.

Asina tambe den su totalidad Gobiernonan Mike Eman I y II, manera CBA a relata na 2010, a cumpli cu tur e deficiencianan di pais Aruba cu tabata haci gobernacion aki na Aruba dificil caminda cu nos por papia di un Aruba cu ta den un situacion financiero stabiel, segun Parlamentario di fraccion di AVP, Chris Dammers.

Fuente: http://awemainta.com