(Aruba) Piloto Venezolano cu a neglisha instruccion di Toren di Aruba a wordo aresta na Aeropuerto

Un Piloto Venezolano a keda deteni pa Polis. El a comete un eror di su bida door di no sigui instruccion di Toren di Aeropuerto Reina Beatrix. E piloto a lanta vuelo for di Aruba cu un avioneta yen di pasahero y direccion Venezuela. Dos minuut despues riba su mes el a dicidi di bira di heading, pone e avion bin back sin comunica corectamente cu Toren di Aruba.

Ademas ora cu Toren a mira kico e ta haciendo, y a dune instruccion, e piloto no a worry y a dicidi di sigui su caminda pa baha back riba pista di aeropuerto di Aruba.

Durante e proceso e piloto aki a hinca bida di tur su pasaheronan den problema pero tambe pasaheronan di un avion comercial di Delta yen di pasahero tambe yegando Aruba y ta den final approach.

E desgracia a hera tuma lugar den aire den espacio aereo di Aruba. Ora cu e situacion aki a presenta toren di control na Aruba mes a bati alarma mesora cerca autoridad.

Bon mes cu no tabata tin desgracia pero tabata falta poco pa esaki sosode. Cu e poco distancia entre e dos avionnan, bo por bisa cu e tabata un near-miss.

E avioneta a baha y e piloto a bay na e parti zuid cu ta e mesun lugar unda e tabata algun minuut prome. No por splica exactamente di con e piloto a bolbe despues di apenas algun minuut di salida.

Polisnan di Grens Bewaking a bay y nan a detene e Piloto. Nos tin entendi cu e avion a worde tuma den beslag riba ordo di fiscal. Abogado a cay aden mesora y a bay atende cu autoridad. Fiscal a dicidi cu e piloto ta keda sera pendiente investigacion. Cuanto acusacion y ki tipo di acusacion tin contra e piloto no ta conoci. Asina mes por bisa cu na Aruba autoridad a tuma e actuacion hopi na serio y e chens ta grandi cu e piloto aki por perde su licencia.

Fuente: https://www.diario.aw