(Aruba) Mike de Meza: CITGO a firma acuerdonan pa start rehabilitacion

Pa Refineria di Aruba y CITGO tabata un momento sumamente importante pa sigui cu e siguiente fase, na momento cu CITGO a firma cu e contratistanan, e compania mayor cu lo rehabilita refineria. CITGO a firma e prome acuerdo di financiamento pe prome fase di rehabilitacion pe aña aki y otro aña y despues lo sigui pe di dos fase.

A firma e acuerdo aki pa asina por start cu operacion di e Refineria na fin di 2018. Minister di Turismo, Transporte, Energia y Medio Ambiente, Ing. Mike de Meza a indica cu a firma un protocol di labor y di migracion cu semper tabata firma cu otro companianan manera Lago, Coastal, Valero, etc. Tambe nan a firma un otro protocol di Duana cu semper ta firma pero na mes momento a optimalisa esaki mas efectivo y tambe a firma un otro acuerdo cu tabata entre CITGO y e companianan di construccion, Technip y Y&V.

Esaki ta haci cu CITGO lo bay di e prome fase pa haci trabounan di preparacion y aworaki lo bay den e fase di ehecucion di e rehabilitacion. Lo contrata hopi hende local pa traha den e refineria y gran parti di e companianan local lo haya trabou, Minister de Meza a expresa. E fase cu ta bin ta cu CITGO mes hunto cu e consorcio lo reuni cu e companianan local pa delibera riba nan experticio, nan disciplina y pa cuminsa contrata trahadonan pa cuminsa traha riba e trabounan cu mester tuma luga.

“Mi kier a sigura pueblo cu un tiki di pasenshi cu nos tabatin, awe nos a yega na un di e partinan mas importante den henter e trayecto aki”, Minister de Meza a comenta. E “hoofd aannemer” EPICI Franchise a firma cu CITGO pe financiamento di e prome fase, mientras cu e di dos fase ta cla pero ta caba prome cu e prome fase.

Na e firmamento di e acuerdonan aki e Presidente di CITGO y diferente Vice Presidente di CITGO tabata presente, pero tambe algun Minister a presencia e momento historico aki. E dia aki tabata masha grandi y pueblo por ta sigur cu lo nota accion relativamente lihe.

E proyecto di rehabilitacion a bay awor riba un otro nivel, lo ehecuta diferente trabou, manera cumpra materialnan, haci trabou di ingenieria, habri tur aparatonan, ta bay sigui inspeccionnan y lo bay cuminsa drecha. Hopi actividad pa keur e refineria lo tuma luga y si tur cos ta bon, pa mas o menos final di otro aña e prome parti di e refineria lo cende pa asina sigui cu e di dos fase. Pa 2019 e refineria lo ta funcionando na 209 mil bari pa dia.

Fuente: http://24ora.com