(Aruba) Construccion di man camp di CITGO Aruba Refinery a cuminsa

CITGO Aruba Refining N.V. a anuncia awe nochi cu e construccion di un Man Camp cu ta consisti di 1500 cama y lo ta e cas pa e trahadornan cu mester pa apoya e projecto di rehabilitacion di e refineria riba e isla, a cuminsa. Awor aki den su prome fase e Man Camp – cu lo ta situa mes caminda cu e man camp di e operador anterior – ta consisti di dormitorio y facilidadnan di servicio. E prome fase aki lo keda cla den luna di Augustus venidero.

E construccion di e Man Camp lo afecta e economia di e isla na un manera positivo cu trabou nan cu tin pa ehecuta ya cu esaki lo genera alrededor di 100 cupo di trabou como tambe mas actividad economico cu compra di material y servicio. Na final e Man Camp aki lo hospeda entre 400 pa 1.500 persona durante diferente fase di e projecto di rehabilitacion di e refineria y esaki lo ta un contribucion directo na e economia local por medio di nan gastonan diario.

“Construccion di e Man Camp aki ta demostra e compromiso di CITGO Aruba pa cu e comunidad aki mientras nos ta traha pa haci e refineria completamente operacional y sigui percura pa oportunidad di trabou pa persona local” asina Jose Pereira, Presidente den Funcion y CEO di CITGO Petroleum Corporation, y Director di CITGO Aruba Holding, LLC. a bisa durante su bishita recien conhuntamente cu e Vicepresidente di Refinacion di Petróleos de Venezuela, SA, Guillermo Blanco; y representantenan di e contratista Constructora Azzurra.

Durante e siguiente simannan comunidad por spera di wak mas actividad tumando lugar den e refineria ya cu e proceso di rehabilitacion ta sigui. Operacion di CITGO Aruba Refinery ta planea pa cuminsa den e di dos mitar di 2018.

(Pulse imágenes para ampliar)

Fuente: http://www.noticiacla.com