(Aruba) Minister Richard Arends ta mustra cu no tin delay pa Citgo na Aruba

Riba Diahuebs, a sali un publicacion internacional cu a yama atencion na Aruba tambe, mustrando cu e refineria di Citgo na Aruba lo bay sufri di un ‘delay di 2 of 3 aña’. Den e situacion aki, ta minister Richard Arends ta e persona corecto pa duna informacion, principalmente pasobra el a negosha tur tempo. Awendia e ta minister y tambe ta envolvi den varios desaroyo.
Minister Richard Arends a refuta e publicacion cu a sali, cu tin biaha ta trece cierto confusion y ta e canal oficial. No a haya nada di parti di Citgo cu tin cualkier desaroyo robes y nan ta cumpliendo.

El a splica cu a sali un publicacion den prensa internacional riba supuesto retrasonan cu lo tin den e refineria y esaki, na conocemento di Gobierno y di Refineria di Aruba, esey no ta e caso. Recientemente Banco Central a saca nan pronosticonan economico pa 2017 y ta tene cuenta cu e situacion actual.

Si mira na Februari, tabata tin 100 hende cu a haya nan badge, 100 hende cu ta trahando na e refineria, sea via Citgo mes of via contratista. Awo nos ta na 438 pa luna di April. Tur esaki ta segun schedule di e rehabilitacion di e refineria, ta loke ta mirando awor aki.

Operacion di e refineria, e prome mita lo ta na 2018 y prome cu esey, lo tin e rehabilitacion cu a cuminsa for di aña pasa, ta tumando luga awor aki. Parti basta grandi lo bay ta na final di e di dos kwartaal di 2017. Ta informacion cu ta conoci cerca Gobierno y tambe ta den e pronosticonan di banco central, pa loke ta crecemento economico, cu ta tene cuenta cu esakinan.

Cumpliendo cu Gobierno

Segun minister Arends, Citgo ta cumpliendo cabalmente cu Gobierno. A ricibi e facturanan. Ta wak cu nan ta cumpli cu e huur tur luna, sin faya un fecha. Di parti di Gobierno, como representante tambe di accionista di Refineria di Aruba, no tin nada di preocupa pa loke ta trata pa loke ta e rehabilitacion di e refineria y tambe e futuro operacion di refineria di Aruba.

Na 2018, e prome trein lo ta cla y lo por cuminsa opera, segun minister Richard Arends.

Fuente: https://www.diario.aw