(Aruba) Refineria di Aruba ta traspasa 92.500 meter cuadra ta bay pa Parke Solar na Lago Heights

Alvin Koolman a firma e siman aki, e convenio caminda Refineria di Aruba ta haci traspaso di tereno pa WEB Aruba N.V. destina pa construccion di un instalacion di produccion di energia solar.

E director di Refineria di Aruba N.V. a expresa di ta sinti su mes masha orguyoso di por yuda canalisa e proyecto cu ta beneficia e isla y su comunidad den alcansa su metanan di sostenibilidad total. Cu terenonan aki cu, antes tabata pa decadanan largo sin uso, awo ta haya un proposito asina importante, ta un manera excelente cu pueblo ta beneficia for di e negociacionnan cu CITGO aña pasa.

“Nos ta wak awe ya caba un parti di e beneficio ora cu nos a a negocia cu CITGO aña pasa pa cierto parti di e terenonan cu no ta worde usa den e proceso di refinacion bin disponibel pa Pais Aruba y cu RDA tin den su maneho aworaki,” sr. Koolman a indica. “Henter e tereno ta casi 3.7 miyon meter cuadra y nos a otorga 92.500 na WEB pa e parke solar aki y esey ta hacie masha factibel y nos ta masha orguyoso di pone esaki disponibel.”

E director di nos compania petrolero estatal a indica cu den e refineria tur cos ta canando di un forma positivo tambe. For di e grupo di 100 local trahando na ciere di 2016, ya awe por mira, cu e datonan di siman pasa, cu tin 280 trahador local trahando den e refineria pa traha e ‘scope of work’ pa por cuminsa cu e ‘start up’.

“Tur esaki ta haci’e masha positivo y mi ta contento cu nos por usa esaki pa algo den energia alternativo,” Koolman a bisa afirmando cu e terenonan cu no ta worde usa den e operacion di refineria, ta disponibel tambe pa otro proyectonan den futuro.

E parke solar na Lago Heights ta bay tin un capacidad di 5.9 MegaWatt cual ta hacie mas grandi ainda cu esun na parkeerplaats di aeropuerto. WEB ta doño di e tereno cual ta hacie hopi ‘cost effective’ compara cu otro proyectonan, ya cu no mester ‘lease’ ningun tereno priva.

Fuente: http://www.diario.aw