(Aruba) Atracador Venezolano castiga cu 10 aña di prison y a hasta usa granada

Diaranzon mainta Hues a dicta sentencia den e caso penal cu Ministerio Publico a cuminsa contra un grupo Venezolano cu a haci serie di atraco arma. Ta trata aki di L.S.R. y E.W.L. kendenan tabata hunto cu N.V.J. y J.d l C.
SERIE DI ATRACO ARMA:

No ta tur e grupo completo a participa na tur e atraconan arma. Tin casonan cu tabata dos. Fiscal a bisa S.R. a haci atraco arma dia 24 Maart 2016 na oficina di number na Piedra Plat.

Tambe tin e caso di asalto arma na un mini market den Caya Betico Croes riba 27 di Maart 2016.

Fiscal a mustra cu S.R. tabatin arma di candela y tambe un granada di man.

E mesun 27 di Maart 2016 tabatin un atraco arma na un supermercado na Macuarima. Dia 17 di April 2016 nan a drenta den un cas den Koningstraat y bay cu prendanan. Tambe a asalta un persona cu tabata cana den Koningstraat.

ASALTO ARMA DENNIS BAR

Dia 15 di Mei 2016 tabatin un asalto arma na Dennis Bar, caminda hasta dos tiro a cay. Den e asalto aki a participa N.V.J., J.d.l. C. tambe envolvi asalto arma na Dennis Bar.

ASALTO ARMA

Hues a puntra J.d l. C. y N.V.J. si nan ta culpable. N.V.J. a admiti na 15 Mei 2016 Hooiberg Dennis Bar y cas na Koningstraat.

Ta asina cu 15 Mei 2016 N,V.J. y un tal W. a presenta y un a saca un arma for di un tas. El a bisa cu “este es un asalto”. Un di e empleadonan a worde ordena pa drumi y despues e asaltante a dale cu skop na cabez. El a pidi pa placa y e empleado a bisa cu e doño a bay cu e placanan. Despues el a Sali y bolbe y los dos tiro. Segun J.d l C., e mester a drenta promer den e bar pa mira e situacion y despues mester laga sa si tur cos ta cla.

N.V.J. a bisa cu e tabatin un arma so. El a bisa cu un homber W. ta esun a planea tur cos.

Hues a puntra N.V.J. pakico el a declara contra J.d l C. El a bisa cu nan a menace pa declara asina. El a bisa cu W. ta esun cu a hib’e na e bar. El a bisa cu W. tin un organizacion na Venezuela y e mester a haci loke nan bis’e sino su famia ta den peliger. El a admiti di a gaña contra J.d l C. pa asina tapa W. El a bisa cu W. tambe tabatin un arma cun’e.

ASALTO CAS

Den Koningstraat cas a worde asalta door di N.V.J. y otro. Damanan a bisa cu e asaltantenan a drenta den e cas y ordena nan pa drumi abou. Nan a coy nan pertenecianan. Tin un di e victimanan a bisa cu un asaltante dal’e cu cabo na cabez y kap su cabez. Un di e testigonan a reconoce N.V.J. como asaltante. N.V.J. a desmenti di a haci e asalto arma. Hues a puntra N.V.J. si e sa kendenan a haci e asalto arma. El a bisa cu si pero e no tabata envolvi. El a bisa cu e no tabata eynan ora asalto a sosode.

Ta asina cu Fiscal a baha pisa riba e grupo aki. El a condena totalmente cu un grupo a bin Aruba pa haci esaki.

CASTIGO PISA

Na December 2016, sentencia a cay caba pa N.V.J. y J.d.l.C. Ta asina cu Fiscal a exigi 10 aña pa N.V.J. Hues a haya e castigo un poco halto y a condena N.V.J. na 8 aña di prison.

Pa J.d l C., Fiscal a exigi 3 aña pero Hues a haya e castigo abou. Hues ta haya cu aki por mira claramente con Arubiano ta usa Venezolano pa haci asalto y ta purba sconde di no ta envolvi. El a condena J.d l C. na 4 aña di prison.

Diaranzon mainta sentencia a cay pa L.S.R. y E.W.L. Fiscal a exigi 14 aña pa L.S.R., kende tabatin arma y hasta un granada di man. El a participa den diferente di e asaltonan arma. Pa E.W.L. el a exigi 7 aña di prison.

Hues Diaranzon mainta a bisa cu e ta haya e duo aki culpable y ta condena L.S.R. na 10 aña di prison mientras cu E.W.L. na 5 aña di prison.

Aunke cu a baha e castigo compara cu e exigencia, Hues a baha man duro contra e grupo aki. Tabata un tremendo trabao di e grupo dinamico di atraco cu a haci tremendo investigacion caminda hasta a manda busca sospechoso for di Venezuela.

Fuente: http://www.diario.aw