Si presenta algún problema para acceder y visualizar “Noticias Candela” visite www.informe25.com (pulse aquí) y vea allí el recuadro amarillo...

lunes, 20 de febrero de 2017

(Aruba) Tres aña y 6 luna di prison pa Venezolano ilegal cu a haci asalto arma riba Minimarket

E Venezolano homber D.G., ta para riba cu e no a haci e asalto arma. Hues a confronte cu imagen di camera di seguridad y tambe cu e doño di e mini market a reconoce riba potret pasobra e tin un cicatriz na su garganta. Fiscal a condena e hecho cu D.G. a bin Aruba for di Venezuela y a keda ilegal pa bay haci asalto arma. El a exigi 3 aña y 6 luna di prison. Hues a confirma e castigo aki.

ASALTO ARMA:

Fiscal a bisa Hues cu e acusacion contra D.G. ta cu riba 7 Augustus 2016, el a haci un asalto arma riba un Mini market cu ta pertenece na comerciante Asiatico, y bay cu 500 Florin.

Camera di seguridad: Hues a puntra D.G. si ta berdad y e ta desmenti. Hues a mustra cu camera di seguridad a graba. A mira un persona tabata algun minuut promer den Mui Mui Foodmart y rato despues a bolbe y haci e asalto arma.

Hues a mustra cu Polis a compara e potret di D.G. despues cu el a worde deteni cu esnan di e camera y nan parce otro. Ademas di esey, e doño di e mini market a reconoce D.G. riba potret como esun cu a haci asalto. E tin un marca na su nek y tabatin cierto keds bisti, cual ta cuadra cu loke ta mira riba e camera di seguridad.

Segun Hues tur esakinan ta circumstancianan cu ta mustra cu ta D.G. ta e sospechoso.

Hues a puntra D.G. si e por splica. Segun D.G. e no sa nada di e asalto. Hues a puntr’e unda e tabata e dia ey. Segun D.G. el a pasa den e caya ey y el a worde deteni. E no sa di nada. Hues a remarca con e doño Chines ta reconoce D.G. Segun D.G. por ta door cu e tabata esun cu a pasa e momento ey den e caya.

Cicatriz na garganta: Hues a mustra cu con e Chines por reconoce D.G. cu e tin un cicatriz na su garganta. Segun D.G. e Chines lo por a mire pasa ey banda. Hues a remarca pakico e Chines ta bay declara contra D.G. Segun D.G. por ta e asaltante tin un parecido di dje. D.G. a bisa Hues cu si el a haci e asalto e lo no pasa den e caya ey mes.

Hues a pidi D.G. pa bay dilanti na e mesa berde pa mira e potretnan cu tin di e camera di seguridad. Hues a confront’e cu e potretnan pero D.G. ta desmenti. Hues a mustra cu e kedsnan ta mesun cos y e persona ta mescos cu D.G.

Ilegal na Aruba: Hues a mustra cu D.G. ta biba na Venezuela y su señora ta biba aya. Hues a puntra pakico el a bin Aruba, segun D.G. el a bin pa busca un trabao pasobra cos ta malo na Venezuela. El a bin como turista. El a bisa cu esey ta e manera cu nan ta haci. Nan ta bin como turista y intencionalmente nan ta keda atras ilegal. E tabata traha ilegal den construccion. Su intension tabata pa yuda su famia.

EXIGENCIA DI FISCAL:

Fiscal a bisa cu tin denuncia di e doño cu un homber a drenta den oranan di anochi. A pone arma na su cabez y exigi pa saca placa for di cash register y dun’e e placa. E homber despues di a tuma e placa, a core bay.

Reconoce e asaltante: Segun e doño Chines, e mesun persona algun minuut promer tabata den e minimarket y a haci compras. Ademas el a riba cu e homber tin un cicatriz di un buraco den su garganta comosifuera ta for di e buraco ey e ta haya rosea.

Despues e Chines a reconoce D.G. riba potret. Riba camera di seguridad Polis a mira loke e Chines a bisa. Polis a constata durante interogacion cu D.G. tin un cicatriz na garganta. Polis, cu permiso di D.G. a saca su potret y a bay compara esey cu e imagennan riba video y ta e mesun persona.

Sospechoso ta gaña: Fiscal a remarca cu D.G. tabata gaña Polis unda e tabata keda. E no por a mustra unda e tabata keda. Fiscal ta haya tur esaki masha straño mes. Tambe Fiscal a mustra cu D.G. no por a bisa cu kendenan e tabata traha den construccion.

Fiscal a bisa cu D.G. ta desmenti cu e tabata den e minimarket.

Fiscal ta haya cu tin suficiente prueba cu ta D.G. ta e culpable. Na opinion di Fiscal, ta parce cu D.G. a bin Aruba pa haci asalto arma pa asina yega na placa. Esaki ta crea inseguridad riba nos isla y ta afecta nos turismo. El a exigi 3 aña y 6 luna di prison kitando e tempo cu D.G. ta sera.

SENTENCIA

Hues despues di a scucha defensa di abogado, a sera tratamento di e caso y a dicta sentencia di biaha. Hues a bisa cu e ta haya legalmente proba cu D.G. a haci e asalto. Hues a mustra cu tin reconocemento di D.G. door di e doño di e mini market. Ademas e imagennan di camera y e keds tur ta mustra riba D.G. Hues ta haya cu no tin duda cu ta D.G. a haci e asalto arma.

Hues a bisa cu e caso ta hopi serio. El a mustra cu D.G. a menaza e doño di e mini market cu arma pa saca placa. Na opinion di Hues, esaki ta causa cu e victima ta keda afecta. Tambe Hues a mustra cu asalto arma ta crea sentido di inseguridad den comunidad. Ademas e ta afecta nos turismo. Hues ta haya cu mester impone castigo pisa. Hues a confirma e exigencia di Fiscal. El a condena D.G. na 3 aña y 6 luna di prison, kitando e tempo cu e ta sera den KIA. Tambe Hues a bisa D.G. cu e por apela si e kier y mester haci esaki dentro di 14 dia.
 
Fuente: http://www.diario.aw

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

LO + LEÍDO...

LO + LEÍDO...