(Aruba) Tin solamente 7 dia mas di inventario di hariña pa Pan na Venezuela

Na e pais bisiña di Venezuela, e rijnan largo di clientenan pafo di Panaderianan ta parce di ta leu di termina. Importacion di trigo cu Gobierno a laga haci, ta sigui di ta insuficiente y e inventario di hariña awor ta casi caba. Esey ta loke e Presidente di e Federacion nacional di Trabajadores de la Harina a laga sa Diabierna.

E Federacion a mustra cu desde e ultimo trimester di 2016, e industria aki ya caba a declara emergencia pa e retrazonan cu tin den importacion di hariña, tanto pa horna pan y cookie, como tambe pa produccion di pasta. Sinembargo nan suplica no a wordo scucha pa Gobierno di Nicolas Maduro, y awor e stock a keda baha.

Nan a mustra cu nan a bati alarma di trempan, pasobra nan sa cu den e prome trimester di 2017 e situacon lo bira critico, y awor nan ta bibando aden. Aworaki e stock di hariña pa horna pan y cookie, lo yega pa apenas 7 dia mas.

El a agrega cu nan a haya tende cu tin un cargamento di trigo cu ta na caminda, pero nan ta kere cu esey tampoco lo no ta suficiente. Pasobra Gobierno ta importa apenas 30.000 tonelada di trigo, cu mester wordo reparti na e 13 companianan cu ta produci hariña na e pais. E compania di mas grandi na Venezuela, cu ta na Catia, ta haya como 5.000 tonelada. Pero esey ta dura nan maximo 1 siman.

E peticion awor ta pa Gobierno di Caracas cuminza importa pa luna 120.000 ton di trigo, pa asina e panaderianan por cubri cu nan obligacion, y pa e clientenan por cumpra tur pan cu nan ta desea.

E scarcedad di materia prima na Venezuela, no ta djis perhudica e comerciante y clientenan, sino tambe e trahadornan ta wordo afecta. E companianan di produci hariña mes ta emplea como 500 trahador, cu ta hopi preocupa, pasobra ora no tin materia prima, nan no por traha y no ta haya sueldo.

E industria ta lamenta cu Caracas ta pone prioridad na importacion di pasta, envez di aumenta e importacion di trigo, pa asina e producto wordo elabora na e pais.

Fuente: http://www.diario.aw