(Aruba) Venezuela ta mirando un kiebro total di empresanan priva

Gobierno di Nicolas Maduro di Venezuela, a anuncia cu salario minimo lo wordo aumenta cu 50%. Un bon idea kizas, pero ya caba esnan den mundo di comercio ta mira cu e aumento aki lo bay aumenta e scarcedad di producto, y tambe hisa inflacion.

“No sa kico ta e berdadero meta di e medidanan aki,” ta loke Francisco Martinez di Fedecamaras (Camara di Comercio) di e pais a laga sa.

El a enfatiza cu Gobierno no ta cumpli cu e convenionan di politica salarial, cu ta duna como regla cu e Presidente mester consulta cu e representantenan legal di e Sindicatonan prome cu e decreta aumento di salario.

Franciso Martinez a bisa cu cada tres luna, Gobierno ta ripiti e tipo di medida aki cu cada biaha e negoshinan na Venezuela no por absorba. “E ta un tema hopi sensitivo, hasta pa Gobierno debi na e cantidad di empleado publico,” el a bisa.

Presidente di Fedecamaras a indica cu Venezuela a cera 2016 cu inflacion di mas halto na mundo y ta den recesion. Ademas, el a duna e noticia tristo cu hopi negoshi a cera di forma definitivo. Den e caso di industrianan, el a bisa cu den henter Venezuela, nan ta operando na 35% di nan capacidad instala.

“Tin un problema di produccion y inflacion cu ta bay hunto.” Nan por a hisa e produccion nacional pa amplia e scarcedad di producto. Y el a bisa cu Gobierno ta responsable pa e perdida di poder di compra na Venezuela.

Francisco Martinez a descarta “un proceso di dolarizacion”, ora di indica cu e solucion lo ta den e autonomia di Banco Central di Venezuela.

Fuente: http://www.diario.aw