(Aruba) Ningun representante di CITGO y Pedevesa tabata conoce Glenbert Croes, corda negocia cune

Durante un conferencia di prensa di Minister di Energia, Turismo y Cultura Mike de Meza, prensa a puntra e mandatario tocante expresionnan di Glenbert Croes di partido MEP, kende a indica cu tin cierto compania cu lo a haya un asina yama ‘Vestigingsvergunning’ pa hasi trabaonan den nos refineria, siendo cu tin companianan di Aruba cu por hasi e mesun tipo di trabao.

De Meza a indica cu e compania en cuestion no tin tal permiso.

“Locual nos a compronde ta cu e ta un compania cual CITGO mes ta doño di dje y ta liga na Pedevesa, cu algun tempo atras a inscribi”.

“Mi a compronde cu e compania ey tambe ta operando na Corsow”.

“Si a caso e compania ta bay hasi trabao of actividadnan na Aruba, nan lo tin mester di e vestigingsvergunning”.

“Sinembargo, semper bo tin e companianan local cu a base di nan meritonan y experiencia tin e capacidad pa hasie”.

Esaki segun e mandatario, kende a sigui bisa cu por tin otro companianan cu tambe ta bin inscribi nan mes na Aruba, pa trabaonan cu nan tin cu hasi na Aruba.

“Si tin companianan di afo cu ta bay bin hasi trabaonan na Aruba, ta bon pa nan ta inscribi, pasobra nos por tene nan responsabel pa pago di impuesto etc. cu nan tin cu hasi”.

“Nos lo sa exactamente ta ki compania nan ta y asina bo no ta haya un compania ta bin hasi trabao bao di un otro capa, sin contribui na economia di Aruba”.

Esaki segun minister de Meza, kende a enfatiza cu e compania no tin un vestigingsvergunning.

“Mi ta kere cu señor Glenbert Croes di un manera of otro ta purba di bruha cos y ta purba di ranca atencion pa su mes, pasobra den pasado bo por a scuche cu ta e tabata e gran negociado di Aruba cu Pedevesa na Venezuela”.

“Awor e ta bisa cu e ta bay hala aden un vergunning si tin un vergunning cu Pedevesa, pues bo ta puntra bo mes ta kico ta su intencion”.

“Bo no por ta serio”.

“Si realmente e tabata tin e contactonan cual segun e el a uza pa negocia, mi ta kere cu e por a coi un telefon y averigua ta kico e compania ey ta, ta ken nan ta y ta kico nan intencion ta”.

“Pero un vez mas esaki ta trece na claridad di tur hende cu na ningun momento Glenbert Croes tabata un negociado pa Aruba, pa cu e refineria”.

“Ma bisa den pasado caba cu na Venezuela y na Houston semper nan a bisa cu na ningun momento nan a negocia cune y nan no ni conoce mes”.

“Ta un biaha el a yega eynan na nan porta y el a puntra si e por saca potret cu nan y nan a hasi esaki”.

Esaki segun de Meza, kende a bisa cu na ningun momento nan a negocia cu Croes.

“Un aña pasa ainda e tabata defende nan y a bisa cu nan ta su amigonan y cu el a negocia cu nan y awe no ta tende ta bisa cu nan lo ta hasi algo straño y cu si MEP drenta Gobierno, nan lo hala aden e contrato cu nan”.

“E tipo di cosnan ey na un banda ta ponebo hari, pero di otro banda e ta ponebo un tiki tristo, cu parlamentarionan ta fia nan mes pa e tipo di populismo ey, cu bo ta mira cu e ta hasiendo”.

“Ora cu Gobierno ta traha, no bin stroba den pia di Gobierno, pa purba di bruha cos”.

“E daño cu bo ta purba causa ta daño na bo propio pais”, segun de Meza.

 

Fuente: http://www.diario.aw