(Aruba) Ta investigando pa saca afor kico realmente esnan den e avion a bin haci na Aruba

Den decada di 1980, Aruba a haye confronta cu un cantidad di “avioneta pirata” cu tabata yega y ateriza na Aruba sin ningun clase di flight-plan, y tampoco ningun notificacion na Toren di Control.

E avionetanan aki ta riba un vuelo pa transporta narcotica y nan ta caba di haci ‘dropping’ y inespera ta haya dificultad tecnico y ta busca e Aeropuerto mas cercano pa ateriza.

Kico a pasa Dialuna anochi cu e avion Piper PA23 Aztec? E tabata haciendo algo ilegal? Transportando droga for di Venezuela of Colombia rumbo pa Mexico of otro lugar, y a bin ateriza aki?

E informacion cu a haya for di e avion, for di e piloto, tabata cu e tabata tin un vuelo cu ta bin for di Haiti, en todo caso, saliendo for di Republica Dominicana pa Haiti y despues pa Aruba. Nan lo a keda un anochi aki. E storia ta cu nan tabata haci un test-flight cu e avion Piper, pa despues bolbe Haiti diamars mainta.

Pero si mira e circunstancia cu a tuma luga y tur loke tabata tin riba e avion, e avion mes no a constata nada di droga of algo asina, pero si tene cuenta cu e plan tabata tin y kico tabata tin riba avion, toch ta trece cierto sospecho y ta na su luga pa autoridadnan haci investigacion riguroso.

Ta importante pa hendenan realisa cu nan a causa un daño na aeropuerto y na e mobilisacion di aeropuerto y nan a crea un riesgo hopi grandi pa siguridad di nos pais. Esey ta algo cu e por pasa bay. E ta keda den man di autoridadnan competente, den e caso aki Ministerio Publico, hunto cu Cuerpo Policial pa determina si den e caso aki e personanan aki lo keda deteni pa cualkier un di e infraccionnan cu nan a comete. Pero e cos mas principal ta cu mester manda señal tambe na tur esnan cu ta sinti cu nan lo por haci loke a tuma luga ayera, cu e señal mester hopi cla cu Aruba no ta tolera tipo di cosnan aki den su teritorio y e ora por ta hasta tin cierto sancionnan cu mester por cay, segun minister Dowers.

E pasaheronan:

E avion tin e matricula HI879 riba e avion, y tin un registro poni cu den pasado e tabata pertenece na e compania TAS Tropical Aero Servicios di Republica Dominicana. Pero e registracion actual di e avion no ta conoci. E logo di e compania TAS ya no tey mas riba e avion Piper.

Loke a constata cu e personanan cu tabata tin abordo, no tabata di Haiti. Nan nacionalidad ta di paisnan Latino Americano, pero e minister no a divulga cual exactamente ki nacionalidad nan tin, pa asina no stroba cualkier investigacion cu tin.

Sinembargo nan no tabata di Republica Dominicana, ni Haiti, sino Latino America.

Investigacion ta mobilisa:

Tur caso caminda cu ta trata di personanan cu ta bin di otro pais y cu ta yega bo teritorio bao di circunstancianan sospechoso, tin cu percura pa identificanan na e manera apropia, y no ta tuma luga no unicamente mira si e documentonan cu nan tin ta autentico, pero tambe lo tuma contacto cu instancianan internacional. Semper ora ta trata di un avion, tin modonan pa controla unda e avion ta registra. Logicamente tambe ta haci uzo di partnernan internacional y e registronan internacional, pa determina e binimento di e personanan aki y logicamente tambe ta determina si nan a bin aki cu cualkier otro intencion di loke nan mes ta bisa.

Pa dialuna nochi mester a traha cu e informacionnan cu nan a duna, sinembargo autoridadnan lo a haci nan investigacion y den oranan cu a bin, lo a haya mas claridad riba kico e personanan a bin haci. No ta considera esaki algo normal. Ta haya e circunstancianan bao di cual nan a bula yega nos pais sospechoso. Ta haya tambe, si mira e piloto, ta un persona di edad halto y no ta prome biaha cu a bula un avion y ta supone cu e persona aki mester tin experiencia pa por move cu un avion asina aki den nos teritorio. En todo caso, e circunstancianan bao di cual nan a baha y e circunstancianan bao di cual nan a yega nos teritorio, mester wordo considera como sospechoso y lo mester conclui un investigacion cu ta tumando luga na e momento aki riguroso pa asina ey determina pakico nan ta aki y pa manda e señal pafo cu no ta tolera e tipo di aventuranan aki cu ta causa un risico hopi grandi pa e aviacion civil y nos pais y tambe nos economia.

E avion Piper na e momentonan aki no ta mira e sentido pa confisk’e, y no por haci nada cun’e toch. Pa awor aki el a keda den man di autoridad pa haci nan investigacion. Tin di compronde cu esey a tuma luga ayera nochi door di autoridadnan di Directie Luchtvaart y Douane y ta supone cu dado momento lo entrega e avion, pero e avion tin asina daño cu no ta mira cu por haci algo den loke ta aviacion civil mas.

Fuente: http://www.diario.aw