(Aruba) Valero lo paga Gobierno decenas di miyones

“Mi ta prefera mi no menciona e suma exacto pasobra mi no sabi’e for di cabez y abogadonan ta poniendo e acuerdo riba papel ainda. Pero e ta tientallen miljoenen”, asina Minister Ing. Mike de Meza a contesta riba e pregunta di cuanto placa e traspaso final aki ta costa Refineria Valero.

Gobierno ta uzando abogadonan local y di Houston den e deal aki, mescos cu Citgo y Valero tambe ta uzando ekiponan di abogado di Merca y di Aruba. Tur esaki pa garantisa cu e acuerdo final di traspaso ta bon hinca den otro y ta coincidi cu e acuerdo di operacion cu Gobierno ta firma cu Citgo.

Ora papia di e acuerdo final di traspaso, mester pensa riba e fila di acuerdonan final, manera ta e suma pa “afhandeling schikking”, e suma pa medio ambiente, pa haci limpiesa, etc. Desde aña 1989 a defini caba un suma di mas o menos 20 miyon Florin den un fondo di medio ambiente. Esey lo pasa pa Gobierno awor. Environmental fund, fondo pa haci limpiesa, afrondingsbetaling segun contract, accijnsnan, belasting, premienan habri.

Pa awor, e unico asunto huridico cu ta keda falta ta e aprobacion final di Parlamento. Ta premira cu e organo mas halto di nos pais lo sostene e leynan aki den forma unanime. E ley ta na Raad van Advies awor, lo mester pasa Comision Central den Parlamento pa despues trat’e den un reunion publico di Parlamento prome cu fin di September, pa Parlamento aproba. Contando desde cu a entrega e ley na Parlamento cu e lo dura entre 4 pa 6 siman. Si plannan continua manera anticipa, anto e “transfer date” lo ta dia 1 di october 2016.

E siman cu ta bin aki Valero lo informa su trahadonan di e areglo. Mescos lo informa e contratistanan trahando den e refineria di e traspaso cu lo mester tuma luga. Citgo di su banda lo cuminsa sinta na mesa cu contratistanan di Aruba pa cera conoci y splica di nan plannan y necesidadnan. Di awor bay dilanti, e procesonan lo bay mucho mas lihe y mas pisa tambe den anticipacion pa inicia cu e trabaonan di renobacion y preparacion pa reapertura.

Un di e aspectonan cu a regla den e acuerdo cu Valero awor ta e cantidad di terenonan cu nan tin y cu mester entrega back na Gobierno. Tin un parti grandi di San Nicolas banda di BSL Laundry te na Zeewijk ta bin back pa Gobierno. Gate 8 y area ta bin back. E tereno na Lago Heights banda di Fort Heuvelstraat tambe ta bin back. Banda di e trailernan banda di Lago Colony banda di International School ta bin back. Un di e posibilidadnan ta pa uza parti di e terenonan banda di BSL Laundry pa por otorga na Repsol pa exploracion di gas. Tambe pa embeyece e area di centro di ciudad di San Nicolas, den cual lo elimina e cura pa asina duna acceso na lama.

Lo dura mas o menos 2 aña di tempo prome cu cuminsa opera e refineria, pues te na 2018 lo tin reapertura parcial y despues di 2 aña mas lo tin reapertura completo.

Fuente: http://www.diario.aw