(Aruba) Tur hende sigur ta pura pa e refineria cuminsa funciona

Alvin Koolman, kende a traha hopi aña den e refineria, a splica cu ainda e no tin ningun funcion den e compania CITGO cu ta bay opera e refineria. E mes ta forma parti di e Team Tecnico cu ainda ta trahando riba apertura di e refineria.

Koolman a expresa di tur hende sigur ta pura pa e refineria cuminsa funciona, pero e trabou prome cu esaki por tuma luga ta masha hopi mes, principalmente pa e parti di documentonan cu mester wordo hinca den otro. “Esaki apesar cu e negociacionnan a caba.

Tin hopi detayes cu mester keda regla, specialmente pa e parti huridico cu mester keda cla cune.” El a sigui conta cu un di e parti importante ta cu mirando cu Gobierno ta bay bira doño di e compania di mercadeo y “supply”, e compania nobo mester tuma tur e trahadonan cu nan beneficionan y añanan di servicio.

E ta algo cu a wordo palabra durante e negociacion, pero pa pone esaki riba papel ta tuma hopi tempo, pasobra mester lanta un fundacion, mester negocia cu e programa medico, plan di pensioen. Esaki tur mester ta cla pasobra unabes cu Valero bay for di Aruba definitivamente no mester tin nada pa bolbe bay cerca nan pa regla.

Pero tambe tin varios punto tecnico cu mester a finalisa, y pone esaki preto riba blanco di forma huridico, y percura cu CITGO ta “compliance” cu henter e operacion di e refineria.

Koolman a splica cu CITGO pa cuminsa mester tuma e 100 trahadonan cu ainda ta den servicio di Valero di cual 35 ta bay den e compania di Mercadeo y e otronan ta bay den e refineria opera door di CITGO Aruba. Cu e cantidad nan tin un gran parti pa uza na apertura. Un di e companianan cu prome ta haya trabou ta esun di Inspeccion cu nunca a haya chens di drenta e planta pa haci nan trabou.

Antes tur cos tabata tuma luga via di documentonan cu tabata wordo entrega. CITGO mester bay evalua con e planta ta pa traha e plan pa e trahadonan por drenta poco-poco. E ta calcula cu si nan cuminsa pa prome di october lo tin 200 extra trahado pa fin di aña. Y pa otro aña ta yega e peak di mas di 2 mil trahado na e refineria.

Fuente: http://www.diario.aw