(Aruba) Tin chens cu pa otro siman tur cos lo keda cla

Tin cosnan pendiente pa loke ta e refineria. E ta un done deal, pero falta algun punto chikito. Pueblo ta pendiente pa e reapertura. Segun Minister di Energia, Mike de Meza, ta saliendo cu un delegacion for di Aruba pa Houston, Texas, caminda cu lo bay tin diferente reunion cu ehecutivonan di Citgo, di Valero y e delegacion di negociadornan di e team di Aruba, caminda cu ta bay papia riba e puntonan cu falta ainda.
E minister a agrega cu e parti di Citgo, ta firma, ta completamente cla. Esey por corda cu a firma na Venezuela y e pakete pa e cambionan di ley cu tin cu pasa Parlamento ya caba siman pasa diabierna a wordo aproba den ministerraad y esaki a bay direccion pa Gobernador, cu ta cana su caminda via Raad van Advies y despues bay Staten pa haya su aprobacion.

Esey ta canando, segun e Minister. Awor aki tin cu Citgo ainda ta e parti di supply agreement, cu ta e parti cu ta regla e suministro y bendemento di diesel, jetfuel, gasolin. E tipo di fuelnan cu ta uza localmente. Tambe tin e ora ey e parti di Valero ainda cu ta cabando awor aki. Ta den e fase final eigenlijk, segun e Minister.

Tin algun punto riba mesa pa discuti y pa purba di yega na otro pa esaki y esey ta trata di bin na un finalisacion awor aki na Houston riba esaki. Ora esaki wordo completa, e ora ey ta cla cu e parti ey, e ora lo por tin un pakete riba mesa cu lo mester wordo firma entre Valero cu Gobierno di Aruba.

Una bes pasa door di negociacionnan e siman aki, tin chens cu otro siman mes Valero lo ta na Aruba tambe, e ora ey lo mester termina tur cos. Ban wak con leu ta yega e siman aki y ohala si por bin cla cu tur cos lo ta super bon, pasobra e ora ey tur cos lo wordo firma otro siman.

Asina esaki wordo firma, e tambe ta bay den e pakete hunto cu Parlamento. Si esey no ta e caso, e ora Valero tey otro siman pa cab’e. Ta den completacion di e acuerdo aki entre Valero y Gobierno. Tin cu bisa cu Valero di su banda tin acuerdonan cu ta negociando cu Citgo mes y nan tambe ta den e fase final di esaki, caminda nan tin cu tambe straighten out algun punto ainda y yega na un acuerdo total cu nan dos tambe por firma esaki. Si esey ta e caso e ora tur ta cla cu tur cos. E ta bayendo den bon direccion, pero ta hopi trabao, segun e minister.

Ya caba tin basta tempo ta bezig cu esaki caba, pero por mira si cu e trabaonan ta avansa y ta yega na un momento crucial cu ta caminda cu tur cos ta keda cla y si esey ta e caso, ta warda ta warda riba Parlamento pa tin e reunion publico hunto cu Gobierno.

Una bes esey ta cla, e ora ta ratifica tur acuerdo cu a firma. E ora por bay over na tin un rehabilitacion, proceso di inicio di rehabilitacion di e refineria di Aruba, bao di operador nobo cu ta Citgo y e doño nobo cu ta Refineria di Aruba, cu ta un compania estatal.

Fuente: http://www.diario.aw