(Aruba) Glenbert Croes a sali pa Venezuela pa topa cu PDVSA

Ya ta lunanan caba cu Gobierno di Aruba ta negociando cu CITGO pa un posibel reapertura di refineria. Aunke cu constantemente ta scucha cu negosacionnan ta bayendo bon, toch nunca mas a haya un “update” di con leu en realidad ta cu e Venezolanonan estableci na Merca.
Diabierna mainta Parlamentario Glenbert Croes di MEP a anuncia cu e ta sali pa Caracas, unda e lo purba sigura cu e refineria lo habri pronto.

Di acuerdo cu Glenbert Croes di MEP, su rol den e encuentronan cu top di PDVSA na Venezuela ta pa sigura cu di berdad tin un “final feliz”. Mas prome e Parlamentario a mustra un poco falta di pasenshi caba ora cu el a bisa Gobierno cu lo no acepta mas tardamento den e proceso aki.

E fecha di 16 di mei ta riba mesa y no por conoce mas tardamento, pasobra economia di Aruba ta sperando riba un “boost” asina for di basta tempo caba. E ta sinti sinembargo cu Gobierno ta yegando hopi leu pero toch no ta alcansa un punto di culminacion of manera nan ta bisa na Ingles, nan no ta logra “seal the deal”.

No ta un secreto cu Glenbert Croes tin bon contacto cu politiconan di Gobierno Venezolano y na mas di un ocasion a topa cu top di e compania PDVSA. Ey el a pidi nan pa pusha pa CITGO bin Aruba, den un esfuerso pa nos isla por conoce un desaroyo economico nobo, banda di turismo.

No obstante cu el a opta pa e ultimo posicion, esta # 29, toch Glenbert Croes ta e di 3 “votegetter” riba lista di MEP cu 2366 voto. E ta bin despues di Evelyn Wever y Xiomara Ruiz.

E storia di CITGO Petroleum Corporation a cuminsa desde aña 1910, tempo cu Henry L. Doherty a funda Cities Service Corporation. Mester menciona cu tabata despues di 55 aña cu Cities a dicidi cu mester cambia su “marca” pa rasonnan di mercadeo y asina a cuminsa propaganda e compania como CITGO na aña 1965.

Na aña 1982 Occidental Petroleum a cumpra Cities Service y asina a incorpora CITGO como un compania riba su mes, manehando e subsidiarionan di refineria, mercadeo y transportacion. Na 1983 a bende CITGO na The Southland Corporation cu ta e compania responsabel pa e stacionnan di gasolin 7-Eleven, bon conoci rond di henter Merca.

Na September 1986 Southland a bende 50% di e accionnan di CITGO na e compania nacional di Venezuela, esta “Petróleos de Venezuela S.A.” (PDVSA) mientras cu na Januari 1990 a bende e otro mita, pa asina PDVSA a bira e doño 100% di CITGO.

CITGO, cu su oficina principal situa na Houston, na Texas, ta bon conoci pa ta den e industria di refineria, pero tambe den productonan final manera gasolin, lubricante, azeta di motor, chemicalnan petrolero y asina por sigui menciona.

Fuente: http://www.diario.aw