(Aruba) Cualkier momento por firma acuerdo entre Citgo y Aruba

Durante fin di siman e delegacion di Aruba, encabesa pa Minister Mike de Meza, a regresa sumamente satisfecho despues di a sostene reunionan intensivo cu e ekipo negociador di CITGO na Miami. Durante su estadia den exterior, Minister Mike de Meza a reuni cu Dr. Nelson Martinez, Presidente y CEO di CITGO Petroleum Corporation. “Hunto nos a fiha e plan di accion di awor te cu dia di firmamento,” Minister Mike de Meza a declara. “Esaki lo por sosode anytime,” segun e mandatario.

Despues cu Gobierno di Aruba y CITGO a finalisa e negociacionan siman pasa y a yega na un acuerdo, e ekiponan a reuni durante e dianan tras di lomba pa asina finalisa e diferente contratonan cu ambos partido lo firma. “Durante e ultimo dianan e discusionan tabata concentra riba e anexonan di e contractnan,” Minister de Meza a splika.

Ademas di e Definitive Participation Agreement, lo tin un serie di contratonan di lease pa e operacion di e refineria y e terminal, como tambe operacionan maritimo. E contratonan principal aki lo tene cuenta cu aspectonan di medio ambiente, relacionan laboral, e regimen fiscal y uso tecnologianan limpi. Lo tin un serie acuerdonan di implementacion pa regla e.o. suministro di gasoline, jetfuel y diesel. “Como parti integral di e acuerdonan aki, lo ta e acuerdo di transicion entre Gobierno, CITGO y Valero,” e mandatario a sigui. “E contrato aki lo garantisa un smooth transition entre ambos operador”.

E fase di negociacion cu a culmina siman pasa tabata uno intenso y compleho entre Gobierno di Aruba y CITGO. E siman aki e equiponan negociador lo ta continuamente den contacto pa asina tin e version final di e texto disponible mas liher cu ta posible. “E rehabilitacion di un pilar economico historico ta mas cerca cu nunca,” asina Minister Mike de Meza a informa na su yegada for di Miami. Unda nos ta awe ta un resultado concreto di e empeñonan cu Gobierno di Aruba ta hibando for di algun aña.

Fuente: http://www.diario.aw