(Aruba) CITGO ta bay tin un impacto positivo riba e mercado local di trabou

Cu e anuncio importante di e reapertura di e refineria como un mehorado di crudo (upgrader) lo tin un impacto positivo pa empleo na nos pais. No solamente cu un cantidad di trabou adicional, pero tambe e nivel di salario. Ta conoci cu e sueldonan den un refineria ta mas halto cu den otro sectornan.

Minister Paul Croes ta calcula cu un cierto momento lo tin 2.500 pa 3.000 persona trahando den e refineria. Esakinan lo ta trabounan di contratista y sub contratistanan.

E impacto den percentage lo ta alrededor di 2% positivo riba desempleo y 15% riba e impacto economico cual ta uno hopi grandi.

Minister di Trabou drs. Paul Croes ta hopi contento cu e logro grandi aki. Despues di lunanan di negociacionnan hunto cu colega Minister Mike De Meza a hiba cu alto ehecutivonan di CITGO, finalmente a logra yega na e acuerdo final.

“Ban prepara pa motibo cu awo tin hopi trabou ta bay inicia. E garantia tey cu, pa medio di e escrutinio cu nos tin, nos Arubiano lo ta e prome yama pa haya un trabou den refineria. E compromiso ey boso tin di cada un di nos,” asina Minister di Labor Paul Croes a confirma.

Citgo Desk ya caba ta conta cu un fondo di dato cu pronto ta bay cuminsa procesa. “A mira interes di hende no solamente na Aruba, pero di Arubianonan trahando actualmente na Trinidad, Surinam, Vietnam, Qatar y Saudi Arabia.”

No ta descarta cu lo mester importa trahadonan. Esey ta un proceso cu lo bay via di e subcontratistanan y lo ta mara na proyectonan di tempo limita, entre 6 pa 12 luna cada un. Ta coresponde na trabounan den cada fase di e proceso de reinicio di operacionnan di e refineria y su cambio pa funcion di upgrader.

“E prioridad ta keda nos Arubianonan,” e titular di labor a expresa. “Nos tin Arubianonan cu experticio cu a demostra cu nan kier regresa nan isla natal y aporta na e desaroyo aki.” asina Minister Croes a duna di conoce na medionan di comunicacion.

Fuente: http://www.diario.aw