(Aruba) Fitch Ratings ta afirma un B pa Citgo Petroleum Corporation cu perspectiva stabil

Dia 4 di februari ultimo Fitch Ratings ta afirma un B pa Citgo Petroleum cu un perspectiva stabil. Den caso aki di Citgo cu ta un compania subsidiario di PDVSA cu si tin un rating cu hopi riesgo.
Sinembargo, Fitch Ratings ta indica cu e acuerdonan cu ta existi entre CITGO y su inversionistanan ta proteha CITGO di e riesgonan aki.

E acuerdonan aki ta isola CITGO di posibel claims di parti di PVDSA. Pa Aruba cu ta negociando cu Citgo petroleo pa reapertura di refineria esaki ta un bon noticia.

Recientemente minister Mike de Meza, titular di Asuntonan Economico, Comunicacion, Energia y Medio Ambiente a reuni cu President y CEO di CITGO na Houston pa asina haci e kick-off pa inicia e negociacionan di e “Definitive Participation Agreement” entre Gobierno di Aruba y CITGO.

Fith Ratings ta di opinion cu Citgo petroleo ta core un riesgo masha minimal di por bay bancarota, esaki apesar di e relacion operacional cu tin entre Citgo y e compania madre PDVSA. For di aña pasa diferente misionnan tecnico, economico y legal a bishita Aruba.

Nan a haci nan investigacionan di e facilidadnan di e refineria, studia nos sistema legal, como tambe haci nan analisis comercial.

Nos ta den un periodo di hopi actividad, di negociacion, evaluacion y investigacionnan pa esaki. Cu inicio di e fase di negociacion pa e Definitive Participation Agreement, lo transcuri un periodo di negociacionnan intenso y compleho entre Gobierno di Aruba y CITGO, como tambe entre Gobierno di Aruba y Valero.

Fitch Ratings ta yega na su conclusion positivo pasobra cu entre PDVSA y Citgo tin un separacion importante structural y legal entre e dos entidadnan. Citgo ta un consorcio bou di ley di Delaware, cual por wordo compara na nos sociedad anonimo, naamloze vennootschap (NV). Nan propiedadnan nan tin domicilio na Merca y ta separa di Venezuela door di dos N.V., Citgo Holding Inc. y PDV Holding Inc.

E factor mas importante cu ta hustifica e separacion entre Citgo y Venezuela ta e convenio di proteccion cu tin pa loke ta Citgo. Teniendo cuenta cu e proteccionnan aki Fitch Ratings ta kere cu ta dificil pa Citgo Petroleo por wordo poni responsabel pa debenan di PDVSA.

Debenan di Citgo no tin garantia of provisionnan di incumplimento cruza relata cu debenan di PDVSA.

Fuente: http://www.diario.aw