(Aruba) Mike Eman contento y satisfecho cu CITGO a dicidi sigui pa un siguiente fase

Un noticia hopi bon a drenta for di Houston, Prome Minister Mike Eman a comenta.Minister Mike de Meza a bay pa reuni cu Citgo. Durante di e periodo cu a firma e MOU y simannan despues, Citgo a cumpli cu e prome parti di e trabaonan cu mester a wordo haci pa por yega na un decision pa un siguiente fase.
E MOU tabata papia di un Due Diligence pa mira e condicionnan entre otro di refineria, e factibilidad di un reapertura y den e ultimo simannan aki, diferente delegacion riba nivel di directiva, pero tambe nivel tecnico di Citgo a bin Aruba y a evalua e estado di e refineria y pa dia 30 di November a pone den e MOU cu mester duna un contesta na gobierno di Aruba si ta bay den e di dos fase di negociacion y deliberacion cu gobierno pa locual por ta e condicionnan pa por yega na un acuerdo pa e reapertura di e refineria.

Minister de Meza a haya e carta cu e noticia positivo di Citgo cu nan kier drenta den e di dos fase pa por cuminsa discuti e Definite Agreement cu ta papia si ta lease e refineria si of no, kico ta e condicionnan di Citgo, condicionnan di gobierno, y pa gobierno ta un indicacion importante di con serio nan ta pa yega na un reapertura.

Ta duna un palabra di cautela toch, pasobra tanten cu no tin un acuerdo firma, ta mara tur partido, ainda hopi cos por pasa. E ta bayendo den un proceso hopi positivo. Palabranan di felicitacion y reconocimento grandi na minister de Meza, pasobra den e proceso aki, durante e ultimo añanan a cana un proceso hunto pa busca e reapertura di e refineria, na Colombia, Brazil, Petrochina y ultimo lunanan, berdaderamente tabata tin un sentimento den gobierno y sigur cerca prome minister, cu probablemente no lo bay haya un partner cu por realisa e reapertura di e refineria y tin cu cuminsa cana e caminda di redestina e area aki. Sin embargo e minister, kende tin un vinculo naturalmente grandi cu e refineria, cu su lombrishi ta dera na San Nicolas, a keda toch cu un empuhe adicional pa busca un señal di unda toch por tin un grupo cu e seriedad. A mira hopi grupo cu sa cu no tabata tin e capacidad pa por realisa un reapertura. PDVSA mes a mir’e inicialmente y a keda pensa hopi. Ecopetrol, Petrobras a pensa cu nan no tabata por. Petrochina na final no a logra. Mester tin un empresa cu tin acceso na crudo, cu tin e forma pa haci esaki factibel y eski ta uno sigur cu Citgo a demostra di por y ta awe den e deliberacionan aki cu Citgo.

Prome Minister kier a duna e reconocimento aki. Normalmente un prome minister ta lidera cierto procesonan manera esaki, pero esaki ta un esfuerso excepcional grandi di minister de Meza, kende ta di Energia, cu a gara e luz aki y el a can’e cu un persistencia y awe tin e apertura den e negociacionnan aki cu un chens basta positivo di un reapertura di e refineria. Tin pa programa 2016, sea un reapertura of un redestinacion di e area aki, e decisionnan ey a tuma nan internamente cu sea ta esun aki of ta e otro, pa por continua cu e desaroyo di nos pais. Hopi oportunidad tin, waf nobo ta wordo construi, un hospital nobo, tin Green Corridor, tin un Watty Vos Boulevard ta bin, desaroyo di MFA den tur bario. Hopi oportunidad cu renobacion di nos barionan y nos centro di ciudad pa hunto cu un decision riba e refineria su destinacion, crea un masa critico di desaroyonan positivo, pa por yega na e resultadonan di mas miho posibel pa nos aña. Por mira aña 2016 hopi positivo. E señalnan ta hopi positivo pa locual ta trata e notification letter cu a haya di Citgo. Naturlmente tin un proceso pa cana ainda pero e ta bayendo den un direccion hopi positivo.

Prome cu dia 31 di December tin un contesta cu si, esaki ta done of toch tin pensamentonan otro. Pero manera cu ta indica awo, den e simannan cu ta bin aki, por cana un caminda cu ta mustra hopi alentador y hopi positivo y spera tambe cu e condicionnan di tur dos banda por wordo topa pa asina por haci esaki realidad, segun e prome mandatario.

Fuente: http://www.diario.aw