(Aruba) CITGO ta sigui cu e negociacionnan pa reapertura di e refineria

Diaranzon atardi a drenta bon noticia for di Houston. Minister Mike de Meza, titular di Asuntonan Economico, Comunicacion, Energia y Medio Ambiente a reuni cu oficialnan di CITGO na Houston.

Durante e reunion aki Gobierno di Aruba a ricibi e notificacion oficial cu e compania CITGO lo sigui cu e siguiente fase di negociacionnan pa e reapertura y rehabilitacion di e refineria.

“E resultadonan di e investigacion tecnico y economico a resulta asina positivo, cu CITGO a tuma e decision drenta den e siguiente fase,” Minister Mike de Meza a declara durante un combersacion for di Houston.

For di final di september diferente mision nan tecnico, economico y legal a bishita Aruba. Nan a hasi nan investigacionnan di e facilidadnan di e refineria, studia nos sistema legal, como tambe hiba combersacionnan cu representantenan di Gobierno.

Di acuerdo cu e Memorandum of Understanding firma dia 22 di september ultimo, CITGO mester a indica na Gobierno di Aruba prome cu 30 di november si lo inicia e negociacionnan pa reapertura di e refineria na Aruba. Segun e MOU e siguiente fase di negociacion lo mester resulta den un Heads of Agreement, of acuerdo marco, cu mester wordo firma prome cu 31 di december 2015.

Minister Mike de Meza a cuminsa conversacionnan cu CITGO for di cuminsamento di a aña aki y a topa cu ehecutivonan di e compania personalmente den varios occasion na Houston y na Aruba. E mandatario a splica cu CITGO, hunto cu Valero y Gobierno tabata tin un periodo di hopi actividad, di negociacion, evaluacionnan y investigacion tras di lomba.

“Cu inicio di e fase di negociacion, lo yega na acuerdonan di principio riba temanan importante entre Gobierno di Aruba e refineria, manera e modelo di negoshi, como tambe aspectonan di medio ambiente, laboral, fiscal y posibilidad pa uso tecnologianan limpi,” Minister de Meza a indica.

Mientrastanto e due diligence, consistiendo di evaluacionnan detaya di tur e aspectonan tecnico y economico, lo continua. E fase nobo aki ta aki ta un resultado concreto di e empeñonan cu Gobierno di Aruba ta hibando for di algun aña. Minister de Meza, aunke cauteloso, a expresa su mes na un forma positivo riba e desaroyonan.

Minister Mike de Meza a subraya cu e periodo nos dilanti lo ta uno crucial. Sinembargo e ta sumamente contento cu e paso aki y ta spera cu e trabaonan nos dilanti lo conclui di un manera satisfactorio pa pueblo di Aruba, en particular e parti p’ariba di nos isla.

Fuente: http://www.diario.aw