(Aruba) Autoridadnan mester cuminsa prepara pa fluho di Venezolanonan

E imagen di Venezolanonan canando den cada skina di Aruba lastrando nan maleta y para na cada bancomatico tratando di saca dollar, ta creando un preocupacion bou di e poblacion.
Alabes ya caba tin indicacion cu banconan local a cuminsa kita mashinnan di swip for di comerciantenan cu ta haci e tipo di fabornan aki pa e venezolanonan cu ta bin specialmente pa saca dollars na Aruba.

E bishitante Venezolanonan aki ta simplemente drenta Aruba pa disfruta algun dia, pero pa haci uzo di nan credit card cu nan a haya pa gasta den exterior pa saca dollars. E dollarnan aki nan ta bolbe Venezuela cu nan pa haci negoshi den e cambio na nan fabor.

E hecho cu nan ta sacando cantidad grandi di dollar for di Aruba ta un preocupacion, pero otro preocupacion ta cu un grupo grandi di e “bishitantenan” aki ta probecha pa traha tambe den forma ilegal. Esaki ta trece cune cu caha di Gobierno no ta beneficia den nada for di e trahadonan aki cu no ta paga nan contribucion na caha di Gobierno.

Sigur e no ta un bunita bista, manera un ciudadano a comenta, di mira grupo di Venezolano canando den caya ta lastrando maleta, cu paki grandi di rolnan di papel hygienico y puntrando tur negoshi cu nan ta drenta si ta acepta tarheta Venezolano.

Hasta den barionan nan ta yegando para na supermercado puntra e localnan cu ta haci compras si nan por duna nan e placa efectivo y nan ta paga e cuenta pa nan cu e credit card di Venezuela.

Esey ta algun di e preocupacionnan cu pueblo tin pa cu e Venezolanonan cu ta yegando na gran cantidad Aruba actualmente. Pero tin un otro preocupacion cu ta relaciona cu e proximo eleccionnan Parlamentario di Venezuela, cu ta dia 6 di december.

Den cuadro di esaki un di e preocupacionnan existente ta kico e lo por nifica pa e fluho di Venezolanonan cu lo ta trata di drenta Aruba, ilegal, of en busca di asilo politico.

Aworaki caba cu e situacion dificil reinante na Venezuela, pa falta di mercancia principalmente esnan di prome necesidad, esnan cu ta bibando hopi aña na Aruba ta comenta cu ta hopi paisando ta yegando Aruba pa keda. No solamente nan ta busca caminda pa keda, pero tambe unda nan por haya trabou.

Y ta parce cu ta facil pa “coy job” den mundo di construccion of den sector hotelero, unda cu na momento cu doño di trabou no kier paga ta simplemente haci un yamada anonimo bisando cu na cierto luga tin ilegalnan trahando.

E problema aki ta loke cu autoridadnan concerni mester sinta na mesa y traha un plan strategico di con ta bay atende cu e asunto aki cu lo tin su consecuencia pa pais Aruba tambe.

Fuente: Con información de http://www.diario.aw