(Aruba) Reunion lo worde pidi pa Minister De Meza bin duna mas detaye y desaroyo riba e MoU firma cu CITGO

Señor Parlamentario Donny Ramijn di fraccion di AVP, Presidente di Comision Fiho encuanto Ciencia, Inovacion, Energia y Desaroyo Duradero, a expresa cu pronto Minister De Meza lo bin Parlamento pa splica e MoU cu a worde firma cu CITGO y duna mas detayes riba e deraroyonan relevante e posibel apertura di e refineria na Aruba door di dicho compania.

CITGO ta un compania petrolero cu ta opera na Merca. E compania tin tres refineria actualmente cu un total capacidad pa refina 749 mil bari pa dia di crudo. Petroleos de Venezuela, PDVSA, ta doño 100% di e compania aki desde aña 1990.

“No ta prome biaha cu PDVSA ta mustra su interes pa opera e refineria na Aruba y e biaha aki por medio di CITGO e posibilidad ta mas grandi”, Rasmijn ta bisa.

Aña pasa e refineria di CITGO tabata pa bende pero no tabata tin mucho interes di compra y nan a para e benta. Pa CITGO por competi fuerte riba mercado Mericano y saca mas ganashi pa su doño, e mester por haya acceso na mas crudo pisa y barata for di Venezuela. Den e Faha di Orinoco tin posnan di crudo super pisa cu su prijs ta 50% mas barata cu e crudo normal.

Pa saca mas di e crudo aki, mester di Naphtha por ehempel pa por mix cune ora cu e worde produci pasobra e ta asina pisa cu e nos por worde transporta puro. Aruba su refineria por worde utilisa como un upgrader di e crudo aki cu ta hisa e calidad di e crudo pa asina e por worde exporta pa Merca unda CITGO lo procese y saca hopi ganashi cu ne.

E Naphtha cu lo worde produci door di e proceso na Aruba, na su turno lo worde manda back pa e area di produccion na venezuela pa asina nan por saca mas crudo pa procesa.
Tur partido den Parlamento a vota pa dos mocion, un di fraccion di AVP y un di PDR, cu ta encera pa busca un posibel re-apertura di e refineria. Gobierno a cumpli cu e mocionnan y hasta a logra sera un acuerdo cu CITGO.

Pronto Minister De Meza lo ta den Parlamento pa duna mas detayes na Parlamento. “Nos di Parlamento, cu a duna Gobierno e tarea pa haci e ultimo intento pa logra habri e refineria, mester haya sa mas detayes di e MoU y tambe nos tin mas pregunta cu nos kier haya mas aclaracion riba nan”, Rasmijn ta termina.

Fuente: http://www.diario.aw