(Aruba) Minister de Meza a Reuni cu Comision Fiho di Parlamento riba Refineria

Ingeniero Mike de Meza, titular di Asuntonan Economico, Comunicacion, Energia y Medio Ambiente a reuni siman pasa cu Comisionan Fiho di Parlamento pa Companianan Estatal y di Utilidad, como tambe pa Ciencia, Inovacion, Energia y Desaroyo Sostenible.

E meta di e reunion aki tabata pa informa Parlamento di Aruba riba e ultimo desaroyonan di un posibel reapertura di refineria na Aruba, como tambe e Memorandum of Understanding (MoU) cu Gobierno di Aruba a firma cu e compania mericano CITGO.

Den un forma extenso Minister de Meza a duna splicacion riba e ultimo desaroyonan encuanto e posibel reanudacion di actividadnan di refinahe na Aruba despues cu a firma e memorandum of understanding cu CITGO.

“E MoU aki a habri caminda pa cuminsa haci estudionan tecnico y economico pa posibel participacion di CITGO den operacion di e refineria,” minister de Meza a splica.

Segun ing. De Meza, mester conclui e fase di due diligence prome cu inicia e negociacionan riba e operacion di e planta na Aruba. E due diligence ta cubri detayenan manera e historia di diferente parti y ekipo di e refineria.

“E proceso di due diligence – esta e evaluacion economico y tecnico – ta canando satisfactoriamente. Tin un cooperacion estrecho entre CITGO, Gobierno di Aruba y tambe Valero cu ta facilita e proceso aki”, e mandatario a conclui.

CITGO ta un di e 6 companianan mas grandi na Merca den e industria di petroleo, number un den e parti di complexidad, conversion for di azeta pisa, azufre y acido.

Participacion di CITGO den e refineria di Aruba por nifica un aliansa strategico di tempo largo cu lo trece inversion, empleo y mas actividad economico pa nos isla.

“Nos kier un refineria cu ta pas den e añanan binti di siglo 21, mas no di e añanan binti di siglo 20,” minister de Meza a bisa.

Cu esaki ta confirma cu ta implementa practica y tecnologianan cu ta resulta den un refineria mas eficiente y cu ta cumpli cu rekisitonan di emision y cu tin menos impacto cu ta posibel riba medio ambiente.

Minister de Meza tabata hopi satisfecho y positivo riba e transcurso di e reunion cu e comisionan fiho di Parlamento. E ta spera cu pronto Parlamento yama un reunion publico unda cu mas detaye por wordo comparti.

Fuente: http://www.diario.aw