(Aruba) Fraccion di Democracia Real cu yamada mas na Minister di Energia

Fraccion di Partido Democracia Real ta keda insisti, y mr. Bikker ta lamenta di no a haya reaccion di e minister encarga cu energia, pa e bin Parlamento y actualiza e informacion encuanto e desaroyonan pa apertura di e refineria.

Parlamentario mr. Bikker a bolbe elabora riba e mocion cu PDR a presenta na Juni ultimo, den cual a insisti pa bin cu un comision pa duna un señal positivo di e mercado di refinamento mundial, di parti di Gobierno di Aruba.

E parlamentario a subraya cu hopi partido a mustra interes pa reapertura di e refineria, y PDR a tuma nota cu un par di siman pasa a wordo firma un “memorandum understanding” (MOU), cu e compania CITGO unda representantenan a bin Aruba pa analiza e estado di e refineria, pero lamentablemente manera ta usual cu e gobierno actual, ta den prensa mester haya sa kico ta pasando.

“E ta un falta di respet cu e minister encarga cu energia no ta bin Parlamento duna un update tocante kico ta pasando, kico ta e contenido di e memorandum understanding, kico ta e plan pa start, y tambe nos kier sa si tin un plan B, pasobra aworaki nos ta masha contento cu tin CITGO sinta na mesa y cu tin un MOU, pero kico ta pasa di e CITGO pa un motibo dicidi cu no kier e reapertura di e refineria. Ohala cu no ta asina, pero mi ta kere si cu ora bo ta traha como gobierno responsable bo mester tin un Plan A y un Plan B”, mr. Bikker a subraya.

Dialuna cu a pasa Fraccion di PDR a bolbe manda un email y a haci un suplica na griffier di Parlamento pa haci atrobe un apelacion na e minister concerni, pa e bin Parlamento.

Dia di apertura di Aña Parlamentario mr. Bikker a topa cu e dignatario y bise cu tin varios siman caba pero no tin hopi desaroyo. Como representantenan di Pueblo parlamento tin hopi pregunta pero no ta haya contesta, y ta den medionan di comunicacion nan ta sa kico ta pasando, y esaki no ta manera den nos Constitucion, ni den nos democracia, como tampoco den e concepto di PDR cu Aruba su democracia parlamentario ta suppose di funciona.

Na final di e conferencia di prensa mr. Bikker a bolbe haci un yamada na e minister, encarecidamente, pa e bin Parlamento y duna un splicacion al dia, kico ta pasando y si por fin Valero a duna di conoce cu nan ta di acuerdo cu un reapertura of si nan ta preparando pa desmantelacion, ya cu na un manera ambivalente gobierno ta bisa un cos y Valero ta bisa algo otro. Pa tur e interogantenan aki mester haya respuesta, tambe si e comision ta trahando teniendo tur opcion habri.

Fuente: http://www.diario.aw