(Aruba) ATIA ta preocupa cu efectonan negativo di “turismo” for di Venezuela

Asociacion ATIA representando comercio ta preocupa cu e efectonan negativo cu e “turismo” no tradicional procedente di Venezuela ta trece cune. Ta conoci cu Venezuela actualmente ta pasando den un periodo di crisis y e efectonan di esaki ta worde sinti tambe aki na Aruba.
Na Aruba nos conoce dos tipo di turismo for di Venezuela, esnan cu regularmente ta bishita nos isla pa añanan largo y esnan cu ta bishita nos isla pa haci uso di e facilidadnan cu e sistema cambiario venezolano ta ofrece nan.
E ultimo grupo aki actualmente dia pa dia ta cresiendo y esaki sigur ta trece algun preocupacion cune.

Siguientemente ATIA lo elabora ariba algun punto di preocupacion.

Situacion na aeropuerto:

E situacion na imigracion na aeropuerto di Aruba ta uno tenso mirando e proceso di control cu tin cu eherce pa turistanan procedente di Venezuela. Manera ta e caso den e ultimo lunanan, e control a intensifica pa loke ta e cantidad di placa cash cu mester tin pa persona pa dia pa por drenta nos isla.

E proceso di control di entre otro placa cash y alohamento di turistanan di Venezuela ta tranca e fluho di turistanan di otro destinacion cu ta yega nos isla. Consecuentemente, esaki ta afecta e prome imagen cu turistanan ta haya di Aruba y ta trece cune comentarionan negativo cu sigur nos no kier. ATIA ta spera cu esnan encarga cu esaki busca solucionnan pa sanea e situacion aki.

Alohamento: Gran parti di e turistanan procedente di Venezuela ta bin pa algun dia y ta keda na casnan di famia y apartamentonan rond di Aruba enbes di na hotelnan. Alohamentonan y taxinan ilegal ta probecha di casonan asina pa haya un entrada extra sin cu tin cu paga belasting. Tambe por a mira casonan caminda no tin alohamento y ta opta pa keda drumi banda di nos beachnan. Diariamente por wak gruponan ta cana na pia rond di nos isla cu maleta. Alohamento den bario ta trece cune cu un cantidad di persona ta trafica den barionan residencial, creando tension pa cu barionan, cu cantidad di auto i hende na tur ora di dia. E imagen y efectonan di turismo no tradicional aki y e promocion di ilegalidad cu esaki ta trece cune ta dañino pa e imagen di Aruba den exterior y cerca otro turistanan cu ta bishita nos isla cu si ta keda na hotelnan y ta gasta placa.

Casonan di “raspao”: Manera menciona anteriormente e situacion financiero na Venezuela ta trece cune cu un grupo di e turistanan venezolano ta bin Aruba pa haci esaki pa motibonan financiero. E grupo aki ta purba di tur manera pa por saca placa for di Aruba. E cantidad di casonan di “raspao” ta alarmante, mirando cu hopi Dollars cash ta worde saca for di Aruba y ta tranca e cash flow aki na Aruba. ATIA ta sostene Aruba Bankers’ Association den nan accionnan contra negoshinan cu ta permiti casonan di “raspao”. Comerciantenan cu ta permiti casonan di “raspao” mester tene na cuenta cu esaki ta ilegal y cu por tin su consecuencianan.

Seguridad: Por ultimo, e preocupacion di mas grandi ta seguridad riba nos isla. ATIA ta preocupa cu e grupo di turista di Venezuela cu sobrepasa nan estadia turistico y ta keda atras na Aruba. E caso aki sigur ta alarmante mirando cu no tin control mas leu di ken ta e persona cu ta drenta y sali for di Aruba. Venezuela actualmente ta un di e paisnan mas peligroso na mundo. Mientras cu algun ta keda Aruba pa busca un miho porvenir, otronan ta busca e manera fasil pa haya placa door di comete actonan di crimininalidad. Aruba ta un destinacion turistico cu ta conoci pa su seguridad y pesey ta importante pa pone mas atencion riba seguridad di nos isla y pa frena e tendencianan di ilegalidad.

Sugerencianan: Recientemente ATIA conhuntamente cu AHATA y FTA a sinta na mesa cu e Ministernan concerni riba e topico di seguridad y a duna algun sugerencia pa mehora e situacion. Entre otro a worde sugeri pa aumenta e presencia y control di polis den areanan di Palm Beach, Eagle, Low-rise y Oranjestad, specialmente durante oranan di anochi y den weekend; aumenta e presencia di polis banda di e beachnan; implementa y aplica un ley nobo pa banda di e beachnan; y pa implementa e proyecto di camara.

Tambe mester sondea e posibilidadnan pa introduci un visa di estadia pa turistanan procedente di Venezuela, manera cu tin pa turistanan procedente di Colombia, y introduci leynan mas estricto pa drenta Aruba. Esaki ta limita e cantidad di persona procedente di Venezuela cu ta drenta nos isla. Pa loke ta e situacion na aeropuerto, ATIA ta sugeri pa implementa un pre-screening di e turistanan procedente di Venezuela prome cu nan yega imigracion y traha un rij apart manera tin pa localnan. Asina ta evita rijnan largo y no afecta e turistanan for di otro destinacion.

ATIA ta spera cu e preocupacionnan aki worde scucha y cu esnan encarga tuma e sugerencianan menciona den consideracion. Di parti di gobierno, ATIA ta spera cu bin cu un plan di accion a corto plaso pa atende cu e problemannan di seguridad y ilegalidad cu ta afectando nos isla. Turismo ta nos unico pilar economico y nos mester cuid’e.

Fuente: http://www.diario.aw