Big Leaguer Melvin Mora anuncia na prensa Mericano su proyecto miyonario di un Baseball Academy na Aruba

Durante un conferencia di prensa na Estados Unidos e basebolista profesional cu ta forma parti di e Hall of Fame di Baltimore, no por a contene su emocionnan pa comparti su siguiente proyecto cual ta un Baseball Academy na Aruba.

Minister Otmar Oduber tabata un di e invitadonan special di Sr. Mora y a ricibi e confirmacion di un inversion miyonario cu e Hall of Famer aki lo kier mira na Aruba. Sr. Oduber ta comparti cu durante Melvin Mora su bishita na Aruba recien, el a keda encanta cu nos isla y cu porcierto ta un conoci di nos talentonan local.

Ta asina cu Sr. Mora a comparti veld cu compañeronan di Orioles manera ta Sidney Ponson, e conoce tambe Eugene Kingsale y Radames Dijkhoff. Tambe Calvin Maduro cu keto bay ta traha di cerca cu Baltimore cual recientemente a firma un otro talento local den persona di Gillian Wernet.

Minister Oduber ta elogia e hecho cu Melvin Mora awor ta cla pa establece un academia di Baseball na Aruba cu ta beneficia no solamente e hobennan di Aruba pero henter region di Caribe y Latino America.

E mandatario ta sigui bisa: “Ma comenta esaki caba cu mi colega e Minister di Deporte, y mi por bisa cu ta henter Gobierno di Aruba ta entusiasma cu e idea aki. Mi kier a gradici Melvin, cu promedio di e organizacion di Baltimore, dentro di poco ta inicia cu un proyecto hopi bunita. Esaki ta encera cu muchanan cu no tin manera pa ta den e deporte na Aruba, lo ricibi e ekiponan necesario pa practica baseball.”

Na luna di october lo tin un proyecto piloto encabesa pa e organizacion di Baltimore unda nan lo percura pa tur e muchanan den bario ricibi e ekiponan.

Esaki den anticipacion pa e Baseball Academy di Melvin Mora riba nos isla.

Fuente: http://www.diario.aw