Asina mr. Bikker a duna di conoce den conferencia di prensa di su fraccion.
Manera ta conoci, e parlamentario a manda un carta pa Valero, siman pasa, pidiendo un aclaracion.
Esaki den sentido cu mientras gobierno ta bisa, cu a base di dos mocion aproba den Parlamento unanimamente, un di nan di PDR, lo bay pidi Valero pa para un rato cu e desmantelacion di e refineria.
No obstante, PDR a tuma nota den prensa, cu un ehecutivo halto di Valero a declara net lo contrario y a bisa cu nan plan ta pa sigui cu e desmantelacion.
Den su carta pa Valero mr. Bikker ta referi na e dos mocionnan menciona, y ta encera cu e compania mester para e desmantelacion pa alomenos un par di luna, pa duna chens pa reapertura di nos refineria.
Tambe mr. Bikker a tuma nota den prensa, un informacion cu a wordo confirma pa gobierno tambe, cu lo tin interes tambe di CITGO, un compania cu tin “joint venture” situa na Merca, cu ta traha entre otro cu PDVSA.
E ta un compania hopi grandi cu tin e potencial pa tuma e refineria di Aruba over, segun e parlamentario.
El a agrega cu tin espacio y cu tin interes, y un bez cu un compania asina grandi mustra interes, indudablemente, otro empresanan lo revisa nan “business case” y, posiblemente, tambe por mustra nan interes.
Bikker a sigui bisa cu awor cu un delegacion di Parlamento tabata na Mexico, nan a haci un intento y a manda un email pa PEMEX, pa nan haya un encuentro informal cu e compania, pero lamentablemente pa e factor tempo, nan no a logra.
E parlamentario a subraya cu Parlamento ta haciendo su maximo esfuerzo pa explora tur e posibilidadnan cu por tin, te na ultimo, pa un reapertura di e refineria.
Entre tanto, mr. Bikker a ricibi contesta di Valero y cu nan ta bezig cu gobierno di Aruba riba e asunto di desmantelacion.
Parlamentario mr. Bikker a agrega cu noticianan contradictorio ta hopi preocupante, pasobra si no pone “on hole” e desmantelacion, e mocionnan cu a wordo aproba pa decision unanime den Parlamento, ta perde sentido.
Segun e parlamentario tog e carta cu el a manda a surti efecto y e ta mira cu speranza pasobra tin un luz na final di gang scur, den sentido cu CITGO a mustra interes aworaki, cu nan por tin interes na tuma e refineria over.
Parlamentario mr. Bikker a acentua cu mester haci tur esfuerzo pa reapertura di nos refineria, pasobra nos pais tin un “single economy” kiermen e ta depende di un pilar economico so, cu danki Dios ta sustenta nos, pero ta haci nos economia hopi vulnerable.
Bao di e circunstancia actual e tin hopi sentido y logico pa sigui explora e habrimento bek di e refineria pasobra e ingresonan cu esaki lo nifica pa nos pais ta entre 12 cu 15 porciento, y gobierno mes ta bisa esey.
Fuente: http://www.diario.aw |
No hay comentarios:
Publicar un comentario
Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.